Ռազմական ոստիկանությունը զբաղվում է այդ խնդրով: Այս մասին Tert.am-ի հետ զրույցում ասաց Պաշտպանության նախարարի մամուլի քարտուղար Արծրուն Հովհաննիսյանն՝ անդրադառնալով խնդրին, թե ինչպես են զինվորների համար նախատեսված օճառները հայտնվել վաճառքում:

«Ռազմական ոստիկանությունը զբաղվում է, հենց արդյունքներ լինեն` կհայտնենք»,-ասաց Արծրուն Հովհաննիսյանը:

Նշենք, որ ֆեյսբուքյան օգտատերներից մեկը իր ֆեյսբուքյան էջում վաճառքում հայտնված ՊՆ  օճառներից լուսանկար էր հրապարակել և գրառում կատարել, որը ներկայացնում ենք ամբողջությամբ.

«Այսօր Գյումրու շուկայից օճառ պետք է գնեի, սիրտս կասկած ընկավ, չգնեցի: Մեր ժողովրդի մեջ կան մարդիկ, ովքեր չեն ուզում փոխվել: Գետինը մտեք, ձեզանից պրծնենք: Ձեր նմանների երեսին թքել է պետք: Ձեզ ոչ մի իշխանափոխություն, հեղափոխություն չի հեղափոխի: Այսպիսի մտածելակերպով անձանց միայն գերեզմանը կփրկի: Գյումրու շուկան է, օճառներ են վաճառում, հատն արժե 100 դրամ: Դրանց վրա նշված է Պաշտպանության նախարարություն: Ախր մենք մեծ գումարներ էլ չունենք, որ տրամադրենք բանակին եւ ոմանք այսպես են վարվում: ԶԼՄ-ները կարող են գնալ եւ նկարահանել, քանի դեռ ուշ չէ, վաճառողը կարող է գլխի ընկնի, վաղն այլեւս չհանի վաճառքի: Գյումրու շուկայում, “Կառոնա” սուպերմարկետից վերեւ բացօթյա վաճառվում է: Վաճառողը մի տարեց մարդ էր, հարցրեցի, վաճառքի ենթակա է, ասաց այո, սակայն ես հասկացա, որ վաճառքի ենթակա չէ, ուստի չգնեցի: ՀԳ.Վստահ եմ, ոմանք էլ նկատած կլինեն ու իրենց սովորության համաձայն «շառից», «փորձանքից» հեռու մնալու համար ձայն չեն հանել»: