Սերբիայի նախագահ Ալեքսանդր Վուչիչն ակնարկել է, որ Բելգրադը կարող է ճանաչել Կոսովոյի անկախությունը, սակայն հնարավոր մեծ գործարքի շրջանակներում ի պատասխան դրան պետք է ինչ-որ բան ստանա:

Այդ մասին Վուչիչը երեկ ասել է ANSA իտալական լրատվական գործակալությանը:

«Մենք պետք է նախ մի փոխզիջում գտնենք, մենք չենք կարող պարզապես ճանաչել Կոսովոն՝ առանց որևէ բան շահելու»,- ասել է Վուչիչը:

«Ես համոզված եմ, որ մեր եվրոպացի բարեկամների օգնմությամբ, Ռուսաստանի, Ամերիկայի, Չինաստանի և այլ երկրների աջակցությամբ մենք կարող ենք լուծում գտնել»,- նշել է Սերբիայի նախագահը:

Կոսովոն Սերբիայի մաս է կազմել 1999 թվականի դրությամբ, երբ ՆԱՏՕ-ն սկսել է ռմբահարել Սերբիան, պարտադրելով, որ սերբերը դադարեցնեն երկու տարի տևած պատերազմում ալբանացիներին արտաքսելու գործելակերպը:

Այսօրվա դրությամբ ՆԱՏՕ-ն շարունակում է ապահովել Կոսովոյի անվտանգությունը, սակայն լարվածությունը երկու բալկանյան հարևանների միջև պահպանվում է:

Արևմտյան դաշնակիցները Սերբիային և Կոսովոյին հորդորում են բարելավել հարաբերությունները:

Եվրոպական միությունը հայտնել է, որ դա է Սերբիային և Կոսովոյին անդակակցություն տրամադրելու հիմնական պայմանը:

Անցած մի քանի ամիսների ընթացքում Սերբիայի և Կոսովոյի նախագահներ Ալեքսանդր Վուչիչի և Հաշիմ Տաչիի բանակցություններում որոշակի առաջխաղացում է նկատվել, սակայն այդ միտումը կանգ է առել այն բանից հետո, երբ Կոսովոն 100 տոկոսի մաքսատուրք է սահմանել սերբական արտադրանքի նկատմամբ:

Պրիշտինան հայտարարել է, թե այդ քայլին է դիմել, քանի որ Բելգրադն արգելափակում է Կոսովոյի կապերը միջազգային կառույցների հետ:

Այնուամենայնիվ փետրվարին Տաչին ասել է, որ «բանակցություններում ի հայտ է եկել գործարքի լավ հնարավորություն»: